Hier kom ik weg: 'Ik mag en moet nou opiens overal wat van vinden'

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Steven Stegen (52) oet 1e Exloërmond wus as kind al dat e journalist worden wol. Dat e nao roem dartig jaor in de journalistiek wetholder worden zul, har e nooit dacht.

As kind, geboren en getogen op Schoonoord, har Steven Stegen twie liefhebberijen: schrieven en peerdrieden. In de viefde klas begund’e met het oetgeven van een blad van de ponyclub bij de manege in Schoonloo. Het blek een veurbode van zien latere wark: de hippische journalistiek. ,,Ik heb warkt veur alle vakbladen die der waren.”

Maor as vanwege de MKZ-crisis in 2001 alles stil komp te liggen, giet e bij RTV Drenthe an de slag. Eerst mak e allent radio, later komp tillevisie- en online-verslaggeving daorbij. Hij kreg met aal neiere technieken te maken en test geern alles oet. ,,Ik har ok in 1995 al een eigen internetsite over de peerdesport. Um online te kunnen, mus ik eerst vieftien floppydisks van de boekhandel op mien computer installeren.”

Onverwacht tillefoontie

Juust as e begun dit jaor op het punt stiet waorop e naodenkt over zien toekomst, kreg e een tillefoontie van BBC2014 met de vraog of e wetholder Jan Zwiers wil opvolgen. ,,Die har ik niet zien ankommen. Vanoet mien wark as verslaggever har ik wal contacten binnen de partij en der was ok een klik. Politiek heb ik ok altied mooi vunden. Bliekbaar hef dat wat triggerd binnen de partij.”

,,Ik zag de oetdaging en was toe an wat aans. Daorbij kende ik de gemiente goed. Ik wus welke underwarpen belangriek bint. Vanof dag ien he’k mij veurnummen um mijzölf te blieven en anspreekbaar te wezen veur iederien. Ik bin wars van ingewikkeld gedoe en maor gewoon een nuchtere Drent.”

Drèents praoten hef Stegen van hoes oet altied daon. ,,As journalist he’k markt dat het deuren opent. Ie komt makkelijker bij mèensen binnen aj dezölfde taol spreekt. Dat mark ik nou as wetholder ok.”

‘Warm bad’

Was e deur een aandere partij vraogd, dan har e niet solliciteerd, zeg e. ,,Ik vuul mij echt verbunden met BBC2014. Het is een partij die echt ontstaon is vanoet de inwoners en die opkomp veur de darpen. Ik vind het belangriek dat die toekomstbestendig blieft.”

Hij is naor eigen zeggen terechtkommen in een warm bad, maor vanwege de coronaoetbraak in de tied van zien installatie weur e ok geliek in het diepe gooid. ,,Van de iene op de aandere dag begunde ik. Dan har ik overleg met ambtenaren en dan was het al gauw: nou wetholder welke kaant gaow op? Dat was wal even een cultuurshock.”

As journalist is e niet wend zien eigen mening te geven. ,,Dat is het grootste verschil met dizze baan; ik mag en moet nou opiens overal wat van vinden. Verder is der ok een grote overienkomst: ie hebt in beide gevallen te maken met mèensen. Goede relaties opbouwen is in beide vakken belangriek.”

Nao roem acht maond hef wetholder Stegen het arg naor zien zin. ,,Wat ik jammer vind, is dat ik vanwege het coronavirus nog maor weinig op pad heb kund en daordeur ok nog niet zoveul inwoners heb ontmoet. Maor ik bin dervan overtuugd dat der ok weer aandere tieden anbreekt.”